کابل ټکی کام (سه شنبه، ۱۸ تله، ۱۴۰۲ل)
په داسې حال کې چې په غزې تړانګې د اسراییلي اشغالګرو هوایي بریدونه دوام لري او د وروستیو راپورونو له مخې د ښځو او ماشومانو په ګډون 780 فلسطینیان شهیدان او 2700 نور ټپیان دي د حماس اسلامي غورځنګ د سیاسي کمېسیون لوړ پوړی غړي “موسی ابو مرزوق الجزیرې ته ویلي، چې د (الأقصی طوفان” په عملیاتو کې یې خپل اهداف په بریالیتوب ترلاسه کړي دي.
نوموړي د دې پوښتنې په ځواب کې چې ایا دوی اوربند ته چمتو دی وویل: چې ډله یې د اوربند په ګډون ټولو سیاسي بحثونو ته چمتو ده؛ خو په خبره یې دا ځل که خبرې کېږي له پخوانیو به توپیر لري ځکه جنګیالیو یې له غزې د باندې ګڼې اشغال شوې سیمې بیرته نیولي او په هیڅ ډول به یې بیا اشغالګرو ته خوشې نه کړي.
د حماس اسلامي غورځنګ د پوځي څانګې “القسام لېوا” ویاند ابوعبیده بیا تېره شپه د یو ویډیویي پیغام په خپرولو سره خبرداری ورکړی و که صهیونیستي اشغالګر د غزې په ملکي سیمو بریدونو ته دوام ورکړي نو دوی به مجبور شي چې اسراییلي بندیان علني توګه اعدام کړي.
اسراییلي رسنیو بیا خبر ورکړی، چې حماس سره یې په څلور ورځنۍ جګړه کې 1300 پوځیان وژل شوي، 4000 ټپیان دي او 150 نور د فلسطیني جنګیالیو لخوا نیول شوي دي؛ خو رویټرز خبري آژانس خبر ورکړی، چې د اسراییلو مرګ ژوبله له هغه څو چنده ډیره ده چې صهیونیستي ریژیم اعلان کړی ده.
