کابل ټکی کام (شنبه، ۱۴ سلواغه، ۱۴۰۲ل)
د سوریې د بشري حقونو د څار ادارې خبر ورکړی، چې امریکا د سوریې په ختیځ کې د ایراني ملېشو پر ۱۱ اډو هوایي بریدونه کړي دي.
د امریکايي پوځ مرکزي قوماندانۍ د یوې اعلامیې په خپرولو سره ویلي، چې دا بریدونه یې په اردن کې د خپلو ۳ پوځیانو د وژل کېدو په غبرګون کې ترسره کړي دي.
د سوریې د بشري حقونو د څار ادارې ویلي، د سوریې په ختیځ او له عراق سره پر پوله د هوايي بریدونو په ترڅ کې د ایراني ملېشو ۱۱ اډې بمبار شوي دي چې د لومړنیو راپورونو پر بنسټ پکې ګڼو کسانو ته مرګ ژوبله اوښتې ده.
تر دې مخکې د سوریې د بشري حقونو د څار ادارې مشر “رامي عبدالرحمن” له “العربیه” سره په مرکه کې ویلي و، چې د څو هوايي بریدونو په ترڅ کې د الانبار ښار په شاوخوا سیمو کې د ایراني ملېشو اډې بمبار شوې دي.
د سوریې د بشري حقونو د څار ډلې ویلي، چې امریکایي الوتکو د المیادین په دښته، د الحیدریه او الشبلي په مرکزونو او د سوریې په ختیځ کې د دیر الزور په څنډو کې درنې بمبارۍ کړي.
رامي عبدالرحمن زیاته کړې، چې په الحیدریه کې د دغو هوايي بریدونو په لومړۍ مرحله کې لږ تر لږه ۲۷ کسان وژل شوي دي.
نوموړي دغه راز ویلي، چې د بایډن تر پرېکړې وروسته دا لومړني عملیات و او په خبره یې، چې ښایي په راتلونکو څو ساعتونو کې ورته نور بریدونه هم ترسره شي.
له پلوه «الحدث» تلویزیوني شبکې خبر ورکړی،، چې د امریکا په بریدونو کې د سپاه پاسداران، قدس ځواکونو، حزب الله او د عراق د اسلامي مقاومت ګڼ مرکزونه په نښه شوي دي او ښایي د مرګ ژوبلې شمېرې تر هغه څو چنده لوړې وي، چې اعلان شوې دي.
د سوریې د المیادین ښار په
امریکايي خبري چینل “ABC News” هم اعلان کړی، چې د سوریې-اردن پر پوله د امریکايي پوځیانو د وژل کېدو په غبرګون کې دا د امریکا د هغو بریدونو پیل و، چې وړمه ورځ یې ژمنه کړې وه.
د ویلو ده، چې امریکايي چارواکو تر اوسه سوریه کې په ایران پورې د تړلو ملېشو په مرکزونو باندې د هوايي بریدونو رسمي مسوولیت نه دی اخیستی؛ خو وړمه شپه ولسمشر بایډن په سوریه، عراق او یمن کې د ایران پلوه ډلو پر مرکزونو د بریدونو پرېکړه تصویب کړې وه.
