کابل ټکی کام (شنبه، ۱۴ سلواغه، ۱۴۰۲ل)
د حماس سیاسي دفتر غړی حسام بدران هیواد ورځپاڼې ته په یوه ځانګړې مرکه کې ویلي چې د اسراییلي اشغالګرو پر وړاندې یې جګړه اوسنۍ نه ده او نه یې هم د اکتوبر په اوومې پورې تړي؛ بلکې د دوی پر وړاندې یې مبارزه لسیزې پخوا پیل شوې ده.
بدران د هیواد ورځپاڼې د خبریال د دغې پوښتنې: (( داسې ښکاري، چې د اقصی طوفان له پیله مخکې مو د اوږدمهاله جگړی چمتووالی درلود، دا سمه ده؟)) په ځواب کې وایي چې موږ له فلسطیني ولس سره د اسرائیلو د اشغال او دوامداره وحشت په وړاندې ان له لسيزو خپله مبارزه کوو، له هغې مخکې صهیونیستي بلواگرو لا پخوا هم د فلسطینیانو وژنو او ځورونو ته ملا تړلې وه او د فلسطینیانو تاریخ د یهودي ظلم او وحشت له هغو دردوونکو پېښو، چې نه يې اخلاقي بېلگه شته او نه یې د نړۍ کوم قانون توجیه کولای شي، ډک دی.
ښاغلی بدران وایي چې پر فلسطینیانو د اسراییلو بلواګرو بریدونه هېڅ قانون نه شي توجیه کولی. دی اشغالګرو د بې ننګو بریدونو په ځواب کې وایي چې دوی پوهېدل چې د اکتوبر د اوومې بریدونه به ورته په لوړه بیه تمام شي، دا ځکه چې اشغالګر خپله ماتې د عام ولس په ټولوژنه او ړنده بمبارۍ کې رانغاړي.
بدران وایي چې اسراییلو بده ماتې خوړلې او اوس یې د ملکیانو په وژنه لاس پوری کړی. په همدې کړنو خپله ماتې توجیه کوي.
د حماس د سیاسي دفتر غړي ویلي؛ موږ داسې جگړې ته ملا تړلې ده، چې د فلسطیني ولس اوږدمهاله برخلیک ټاکونکې ده او په دې لاره کې د قربانۍ لپاره چمتووالی لرو او د ولس همدا سرښندنه د فلسطین د ازادۍ لپاره د مبارزې برخه او د خپل برخلیک ټاکلو لاره بولو.
د حماس د سیاسي دفتر غړی ښاغلی بدران د افغانستان ازادۍ ته په نغوتې وایي: ((افغان مجاهد ولس د دې ښه تجربه لري، په ځانگړې توگه هغه مهال چې له نړیوال اتحاد سره يې له ستړیا او شاتگ پرته شل کاله جهاد او جگړه وکړه، له شک پرته همدې افغاني تجربې د عربي او اسلامي ولسونو د بیدارۍ او د اسلامي امت د راتلونکو بریاوو لپاره درس او زیری درلود.))
دا تجربه او د نورو ولسونو لکه عراق او الجزایر، موږ ته د جهاد د لارې د غوره کولو او په دې لار ه کې د ناامیدۍ نه کولو درس راکړ، سره له دې چې زیان او بیه به یې لوړه وي؛ خو خپلواکي په همدومره قربانۍ او سرښندنې تر لاسه کېږي.
ښاغلی بدران هیله ښيي چې دوی یوه لحظه هم غافله نه دي او د اسراییلو پر وړاندې خپلو عملیاتو ته دوام ورکوي.
نوموړي د اکتوبر د اوومې د علمیاتو د چمتووالي په اړه وایي: (( پرته د اسرائیلي اشغال په وړاندې یوه لحظه هم نه یو ولاړ او پایله یې همدا وه، چې د اکتوبر په ۷مه یې د اسرائیلو له پولو د تېرېدو گړندی او بریالی ځواک راکړ او په څو ساعتونو کې د غزې فرقه له منځه یوړل شوه او لسگونه اسرائیلي عسکر مو بندیان ونیول، د اسرائیلو غرور مو مات کړ.))
بدران زیاتوي چې د اسراییلو تلفات له هغو څو چند دي چې په رسنیو کې لاس په لاس کیږي. وړاندې وایي: (( چې له ۱۱۰ ورځو زیات د کتائب القسام په مشرۍ او رهبرۍ فلسطیني مقاومت روان دی او د همدې مقاومت او جگړې په پایله کې د اسرائیلي رسنیو د راپورونو له مخې لسگونه اسرائیلي عسکر مړه او په زرگونو يې ټپیان شوي دي.))
بدران د هیواد د هغې پوښتنې په ځواب کې چې اوربند کوي او که کوي یې په کومو شرطونو؛ زموږ شرطونه د لنډ مهالي اوربند پر ځای پر غزه د اسرائیلو له خوا د عام وژنې عاجل او سراسري اوربند، “د ټولو په مقابل کې د ټولو” بندیانو پر بنسټ له اسرائیلي زندانونو د فلسطینیانو خلاصون، د بیارغونې واضح ضمانتونه او د ټولو زیانونو جبران او له غزې د محاصرې پای ته رسول دي.
نوموړی د بل سوال په ځواب کې چې د حماس او حزب الله د تړاو په اړه وشو، وویل: له ځینو خپلمنځي اختلافاتو او د هېوادونو تر منځ د بېلابېلو کشمکشونو سره سره، د سیمې هېوادونه او ژوندي ځواکونه لا هم اسرائیل خپل لومړی دښمن بولي او پر دې سربېره په نړۍ او سیمه کې د فلسطین مسله د ټولو خپلواکو هېوادونو او ولسونو لپاره له یو دریځه مطرح کېږي.
د حماس د سیاسي دفتر غړی ښاغلی بدران له عربي او اسلامي هیوادونو په زغرده غواړي چې د فلسطین ننګه وکړي او د امریکا د دریځ پر وړاندې څرګند ودریږي او د فلسطینیانو د عامه وژنې مخه ونیسي.