کابل ټکی کام (پنجشنبه، ۱۰ کب، ۱۴۰۲ل)
د یمن د حوثیانو بنسټګر مشر “سید عبدالمالک حوثي په خپلو تازه څرګندونو کې ویلي، چې د فلسطيني ملت د ملاتړ لپاره مو تر اوسه ۵۴ بيړۍ په نښه کړي دي.
حوثي، چې د حوثیانو بنسټګر، روحاني مشر او د یادې ډلې د پوځي څانګې “انصار الله” رهبري کوي. المیادین تلویزیوني شبکې سره په یوه ځانګړې مرکه کې ویلي، چې ځواکونو یې په غزه کې د فلسطیني ملت د ملاتړ لپاره د خپلو عملیاتو په لړ کې تر اوسه ۵۴ بېړۍ په نښه کړې، چې ټولو یې امریکا، برېتانیا، اسرائیلو او فرانسې پورې اړه درلودلې او صهیونیستي اشغالګر- ترهګر ريژیم ته یې وژونکې وسلې لیږدولې.
نوموړي د خپلو خبرو پر دوام ویلي، چې د تېر کال د نومبر میاشتې له نیمایي یې د بالستیک توغندیو او بې پیلوټه الوتکو په وسیله په دوښمنانو ټول ۳۸۰ بریالي بریدونه ترسره کړي دي. نوموړی خبرداری ورکړی، چې پر یمن د امریکا او برېتانیا روان بریدونه یې عزم نه شي ننګولی او تر هغو به د فلسطیني ویاړلي ملت په ملاتړ خپلو بریدونو ته دوام ورکوي، ترڅو چې صهیونیستي ریژیم پر غزې خپلو ترهګریز بریدونه نه وي درولي.
عبدالمالک حوثي ټینګار کړی، چې ځواکونه به یې داسې د حیرانتیا وړ کارنامې ترسره کړي، چې دښمنان یې فکر هم نه شي کولی، موږ به دوی ته له هغه لا ډېر زیانونه واړوو چې تصور یې هم نه شي کولی.
