کابل ټکی کام (پنجشنبه، ۱۰ کب، ۱۴۰۲ل)
اسرائیلي رسنیو خبر ورکړی، چې ډېر ژر به د لبنان په جنوب کې د حزب الله غورځنګ پر وړاندې پراخ او ځپونکي عملیات پیل شي.
اسرائیلي رسنیو د موساد د یوې سرچینې په حواله خبر ورکړی، چې د تېره ورځ د لومړي وزیر نتنیاهو په مشرۍ د اسرائیلي حکومت کابینې پرېکړه کړې ده، چې د اکتوبر له ۷ مې نېټې راهیسې د لبنان-اسرائیل پر پوله د حزب الله مقاومتي غورځنګ لخوا پرې څه باندې ۲۰۰۰ بریدونه ترسره شوي، چې په پایله کې یې د دوی ځواکونو او په سیمه کې مېشتو اسرائیلي وګړو ته د پام وړ مرګ ژوبله اوښتې ده.
که څه هم د موساد یادې سرچینې د عملیاتو د پیلولو د دقیقې نېټې په تړاو څه نه دي ویلي؛ خو په خبره یې پلان چمتو شوی او هره شیبه د عملیات پیلول امکان لري.
د ویلو ده، چې د یادو راپورونو تر خپرېدو وروسته د بایډن ادارې خبرداری ورکړی، چې د لبنان په جنوب کې د حزب الله پر وړاندې ممکنه عملیات به د یو داسې ستر کړکیچ لامل شي، چې ابعاد به یې نامعلوم وي او ښایي له لبنان سر بیره ځینې نورو عربي هیوادونو ته هم د جګړې لمن پراخه شي.
