کابل ټکی کام (جمعه، ۱۱ کب، ۱۴۰۲ل)
د حماس اسلامي غورځنګ د سیاسي دفتر مشر “اسماعیل هنیه” په خپلو تازه څرګندونو کې ویلي، چې اسلامي نړۍ راته یوازې دعا کوي؛ خو د امریکا په ګډون ټول غربي هېوادونه اسرائیلو ته د فلسطیني ملت ته وژلو لپاره وسلې ورکوي.
نوموړی زیاتوي: زموږ او اسرائیلو ترمنځ په روانه نا انډوله جګړه کې یوازې همدا توپیر دی، چې په ویلو یې انسان شرمیږي.
نوموړي له اسلامي نړۍ د ګیلې په ډول ویلي، چې د اسرائیلي ترهګر ریژیم په خلاف روانه جګړه کې هېڅ کوم اسلامي هېواد د فلسطیني ملت ملاتړ ونه کړ.
هنیه د خپلو خبرو پر دوام د فلسطین قضیه د ټولې اسلامي نړۍ ګډه مسئله بللې ده؛ خو په خبره یې د اسلامي نړۍ واکمنانانو د امریکا له ویرې او د خپلو ګټو د ساتلو لپاره یاده قضیه هیره کړې ده.
د ویلو ده، چې د حماس غورځنګ دغه لوړ پوړي مشر یوځل بیا ټینګار کړی، چې د ځواکونو مورال یې غښتلی ده او تر هغو به د صهیونیستي ريژیم پر وړاندې جګړې ته دوام ورکوي، چې ترڅو یې خپل اهداف نه وي تر لاسه کړي.
