کابل ټکی کام (یکشنبه، ۲۳ ثور، ۱۴۰۳ل)
د راپورونو له مخې په تېرو ۴۸ ساعتونو کې د غزې تړانګې په بېلا بېلو برخو کې د حماس اسلامي غورځنګ او نورو فلسطیني مقاومتي ډلو سره په نښتو او چاودنو کې ۵۷ اسراییلي پوځیان وژل شوي او لسګونه نور ټپیان شوي دي. المیادین خبري آژانس د حماس د سرچینو په حواله خبر ورکړی، چې صهیونیستي پوځیانو ته ډیره مرګ ژوبله د غزې تړانګې شمال کې اوښتې ۷ ټانکونه یې په بشپړه توګه ویجاړ شوي او ۲۰ تنه پوځیان یې وژل شوي دي. دغه راز القدس لېوا ادعا کړې، چې د غزې تړانګې په مرکزي سیمو کې یې د اشغالګر پوځ درې ټانکونه په چاودېدونکو توکو الوځولي، چې په پایله کې یې ۱۲ اسراییلي پوځیان وژل شوي دي. د اسلامي جهاد سرچینو بیا “المنار” تلویزیوني شبکې ته ویلي، چې د غزې تړانګې په “رفح” ښارګوټي کې یې د اسراییلي پوځ پر یوې اډې د بې پیلوټه الوتکو بریدونه کړي، چې په پایله کې یې ۱۵ اشغالګر پوځیان وژل شوي دي. په ورته مهال حزب الله غورځنګ ادعا کړې، چې د لبنان-اسراییلو پر پوله یې د صهیونیستي پوځ پر یوې اډې د بې پیلوټه الوتکو او توغندیو بریدونه کړي، چې په پایله کې یې ۱۰ تنه اسراییلي ترهګر پوځیان وژل شوي دي. د یادونې وړ ده، چې اسراییلي رسنیو هم خبر ورکړی، چې غزه، رفح او د لبنان سره په ګډه پوله یې په بېلا بېلو پېښو کې ګڼو پوځیانو ته مرګ ژوبله اوښتې ده.
