کابل ټکی کام (یکشنبه، ۶ غبرګولی، ۱۴۰۳ل)
د ایرنا خبري اژانس د خبر له مخې د لبنان-اسرائیلو پر پوله د لبنان د اسلامي مقاومتي غورځنګ حزب الله د ځواکونو په برید کې ګڼو صهیونیستي پوځیانو ته مرګ ژوبله اوښتې ده.
ایرنا خبري آژانس د حزب الله د سرچینو په حواله خبر ورکړی، چې ځواکونو یې وړمه ورځ د اشغال شوی فلسطین په شمال کې د صهیونیستي رژیم د “مرکاوا” پرمختللی ټانک په نښه کړی، چې په پایله کې یې ټانک په بشپړه توګه ویجاړ او پکې سپاره اشغالګر پوځیان وژل شوي دي. د “حزب الله” په خبر پاڼه کې راغلي: چې ځواکونه به یې د غزې په تړانګه کې د فلسطیني ملت د ثابت قدمه، میړني او با عزته مقاومت په ملاتړ د لبنان-اسراییلو په پوله د اشغالګرو پر وړاندې خپلو عملیاتو ته دوام ورکوي. د یادونې وړ ده، چې اسرائیلي رسنیو هم د لبنان-اسرائیلو پر پوله د حزب الله برید کې خپل لوري ته د اوښتې مرګ ژوبلې پخلی کړی دی.
