کابل ټکی کام (جمعه، ۱۵ چنګاښ، ۱۴۰۳ل)
په داسې حال کې، چې د مصر، قطر، امریکا او ځینو نورو هیوادونو لخوا یوځل بیا د حماس او اسرائیلو ترمنځ د خبرو اترو د پیلولو لپاره هڅې روانې دي. د حماس اسلامي غورځنګ یو لوړ پوړي غړي “اسامه حمدان” ویلي، چې هېڅ هغه هوکړه به ونه مني چې د فلسطین خپلواکي ګواښ سره مخ کوي. حمدان چې د لبنان پلازمېنه “بېروت” کې یې یوې خبري ناستې ته خبرې کولې وویل: اوس حالات بدل شوي اسرائیلي اشغالګرو غزه کې ماته خوړلې اوس هڅه کوي، چې په سیاسي سټیج یو څه لاس ته راوړي. نوموړي ادعا کړې، چې د خبرو اترو څو مادییز پلان د امریکا لخوا چمتو شوی موږ او هېڅ بلې فلسطیني مقاومتي ډلې ته د منلو وړ نه دی. د حمدان په خبره د ځواکونو مرال یې غښتلی ده، صهیونیستي ريژیم یوې داسې جګړې کې ښکیل شوی، چې له شرمونکې ماتې پرته به کوم بل څه لاس ته ور نه شي. د یادونې وړ ده، چې د حماس اسلامي غورځنګ دغه لوړ پوړی، چارواکی داسې مهال دا څرګندونې کوي، چې ځینو نړیوالو رسنیو خبر ورکړی، چې د امریکا او قطر لخوا په یاد غورځنګ فشارونه مخ پر ډیرېدو دي او حماس اسلامي غورځنګ پرېکړه کړې، چې له دوحې خپل سیاسي دفتر د عراق پلازمینې بغداد ته ولیږدوي.
