کابل ټکی کام (دوشنبه، ۱۸ چنګاښ، ۱۴۰۳ل)
د حماس اسلامي غورځنګ د پوځي څانګې “القسام” ویاند “ابوعبیده” په خپلو تازه څرګندونو کې د اسرائیلي بندیانو کورنیو ته په خطاب کې ویلي، چې د اولادونو برخليک یې د نتنياهو په لاس کې دی. ابو عبیده په یوه ویډیویي پیغام کې، چې د الجزیرې نړیوالې تلویزیوني شبکې خپور کړی دغه راز ویلي، چې د مقاومت د ځواکونو مرال غښتلی دی او د رفح په ګډون یې د غزې تړانګې په بېلا بېلو سیمو کې زرګونه نوي جنګیالي استخدام کړي دي. د نوموړي په خبره ځواکونه یې درنو او سپکو وسلو ته لاس رسی لري او د غزې په ګڼ شمېر سیمو کې دا مهال له صهیونیستي اشغالګرو سره خونړۍ نښتې روانې دي. ابوعبیده رفح ښارګوټي کې د جګړې په اړه وویل: دغه جګړه زموږ د ځواکونو د بریا او د دوښمن د ماتې ښکاره ثبوت دی. نوموړي دغه راز یوځل بیا ټینګار کړی، چې د “اقصی طوفان” عملیات چې د کومو اهدافو لپاره پیل شوي و هغه یې تر لاسه کړي دي. نوموړي صهیونیستي ريژیم ته په خطاب کې ویلي: د ملکي وګړو وژل او د عامه ځایونو ویجاړول کومه بریا نه ده، بلکې دا ستاسو د پوځ اخلاقي ماتې څرګندوي. د یادونې وړ ده، چې د حماس غورځنګ د پوځي څانګې ویاند “ابوعبیده” یوځل بیا د عراق د اسلامي مقاومت سازمان، د یمن د وسله والو ځواکونو، حزب الله غورځنګ او په سیمه کې له هغو ټولو ډلو مننه کړې، چې د فلسطین، غزې او بیت المقدس په ملاتړ د صهیونیستي ريژیم پر وړاندې مقاومت کوي.
