کابل ټکی کام (جمعه، ۵ زمری، ۱۴۰۳ل)
د راپورونو له مخې د یمن وسله والو ځواکونو په عدن خلیج کې یوه برېتانوي بیړۍ په نښه کړې ده. د یمني ځواکونو ویاند جنرال “یحیی سریع” یوې خبري ناستې ته د خبرو پر مهال ویلي، چې یاده بېړۍ د یوې برېتانوي کمپنۍ اړوند وه، تل أبیب ته یې وژونکې وسلې لېږدولې، چې د دوی د ځواکونو لخوا په بالستیک توغندیو وویشتل شوه. د یحیی سریع په خبره په نښه شوې بیړۍ په بشپړه توګه له منځه تللې ده. دا په داسې حال کې ده، چې څو ورځې وړاندې د یمن وسله والو ځواکونو د صهیونیستي ريژیم پلازمېنه تل ابیب باندې هم د بې پیلوټه الوتکو برید کړی و، چې د اسرائیلي رسنیو د راپورونو له مخې پکې ۱۱ کسانو ته مرګ ژوبله اوښتې وه. د یادونې وړ ده، چې د یمن د وسله والو ځواکونو ویاند یوځل بیا ټینګار کړی، ده، چې په سور سمندرګي، عدن خلیج، بحرین سمندر او هندي سمندر کې به یې د اسرائیلي، امریکایي، او برېتانوي بېړيو پر وړاندې عملیات دوام لري.
