کابل ټکی کام (جمعه، ۹ وږی، ۱۴۰۳ل)
د افغانستان اسلامي امارت د بهرنیو چارو وزیر مولوي امیرخان متقي کامیرون کې د اسلامي همکاریو سازمان د بهرنیو چارو وزیرانو په ۵۰ مه غونډه کې له هیوادونو غوښتي، چې د افغانستان د مرکزي بانک د ټولو شتمنيو د ازادولو او له افغانستان څخه د اقتصادي او د افغانستان اسلامي امارت له مشرانو څخه د سفري بنديزونو د لرې کولو له پاره جدي هڅې وکړي.ښاغلي متقي زیاته کړې، چې د اسلامي همکاریو سازمان غړي او نور هیوادونه دې د ګډو مشروع کټو پر اساس له افغانستان سره اقتصادي او سوداګريزې اړیکې ټینګې کړي.د بهرنیو چارو وزیر د سيمې او نړۍ هيوادونو ته ډاډ ورکړی، چې د افغانستان خاوره به د هيچا په خلاف نه کاريږي او له هغوی یې غوښتي، چې له افغانستان سره بالمثل تعامل ولري.مولوي امیرخان متقي راز د فلسطین اوسني وضعیت ته په اشارې سره ویلي، له تير نږدې يوه کال راهيسې چې په کومه بڼه د اشغالګر صهیونستي رژيم لهخوا د فلسطين د مظلومو خلکو بې رحمانه نسل وژنه روانه ده، په تاريخ کې ساری نه لري.نوموړي ویلي، چې د فلسطین حالت په هېڅ ډول د توجيه وړ نه دی او دا د نړۍ د ټولو بشرپالو هيوادونو، په ځانګړې توګه د اسلامي همکارۍ سازمان مسوليت دی، چې د فلسطين قضيې ته عاجل، عادلانه او دايمي حل پيدا کړي.
