کابل ټکی کام (سه شنبه، ۲۰ وږی، ۱۴۰۳ل)
ټاپي د افغانستان لپاره غوره او حياتي پروژه ده، چې د عملي چارو په پيلېدو سره به يې د هيواد د ابادۍ او ښېرازۍ پر لور يو ستر ګام واخيستل شي.اسلامي امارت د هيواد ستراتيژيک موقعيت ته په کتو هڅه کوي، چې له انرژۍ څخه غني مرکزي اسيا د انرژۍ له کمبود سره مخ سويلي آسيا سره ونښلوي.د انرژۍ دغه پروژه ،چې د افغانستان له لارې تېريږي د ټاپي پروژه ده، چې افغانستان کې به يې عملي چارې ډېر ژر پيل شي.د ټاپي نلليکه شاوخوا يو زر او ۸۲۱ کيلو متره اوږدوالي لري، چې ۸۲۱ کيلو متره يې د افغانستان له خاورې څخه تېريږي.ياده نلليکه په کلني ډول د ۳۳ ميليارده مترو مکعبو ګاز د لېږد ظرفيت لري او د ترانزيټ فيس (حقالعبور) له درکه يې افغانستان ته ۴۵۰ ميليونه ډالره کلني عوايد اټکل شوي دي.څرنګه چې د ټاپي نلليکه د افغانستان له دوو ممو ولايتونو (هرات او کندهار) څخه تېرېږي، دا ولايتونه به له ارزانه او پايداره انرژي څخه برخمن شي.ياده پروژه له ترکمنستان څخه پيل، د افغانستان له خاورې څخه په تېرېدو به لومړي پاکستان او په پای کې هند ته ورسېږي.د دې نلليکې د رغولو او وروسته د استفادې پر مهال د حفظ او مراقبت او امنيت په برخو کې زرګونه کسانو ته په مستقيم او غير مستقيم ډول د کار زمينه برابرېږي.دغهراز افغانستان له دې ګاز څخه په ګټې اخيستلو سلګونه ميګاواټه برښنا هم توليدولای شي.د دې سترې اقتصادي پروژې په پيلېدو سره به مو هيواد پر ځان بسيا شي، هيوادوالو ته به د کار زمينه برابره او ډېر ځوانان به د بهرنيو هيوادونو له مسافرت څخه وژغورل شي. د دې تر څنګ ټاپي د هيواد لپاره له لاسته راوړنو يوه ډکه پروژه ګڼل کېږي.د افغانستان اسلامي امارت رهبرۍ د ټاپي پروژې د پلې کولو په موخه ګړندۍ هڅې پيل کړي، چې ډېر ژر به يې د افغانستان په خاوره کې عملي چارې پيل شي.د دې پروژې په پلي کېدو سره به اقتصادي ودې او پرمختګ ته لاره اواره شي او هېواد به ګړندي پرمختګ ورسره وکړي.د يادونې وړ ده، چې افغانستان د منځنۍ او سويلي اسيا ترمنځ د ترانزيټ او انرژۍ د لېږد لپاره له ټولو نږدې او امنه لاره ده او اسلامي امارت تل هڅه کړې، چې له دې لارې څخه منځنۍ او سويلي اسيا ونښلوي او افغانستان د سوداګرۍ پر مرکز بدل کړي.
