کابل ټکی کام (چهارشنبه، ۲۷وری، ۱۴۰۴ل)
د راپورونو له مخې، متحده عرب امارات غواړي چې د اسرائیلو په ملتیا د یمن پر حدیده بندر برید وکړي ترڅو له حوثیانو یې ونیسي، خو په دې اړه سعودي عربستان له اماراتو سره اختلاف ښودلی دی.
سعودي عربستان ويلي، حکومت يې ډاډه نه دی چې دغه جګړه دې له يمن څخه وګټل شي او ويره لري چې په راتلونکي کې به يوځل بيا د يمن د حوثيانو تر شديدو توغنديزي بريدونو لاندې راشي.
سعودي عربستان د سه شنبې په ورځ څرګنده کړې چې متحده عربي اماراتو د یمن سواحلو ته نږدې خپلو اډو ته بهرني مزدور جنګیاليو لېږدول پیل کړي دي.
هغه ټولنیزې رسنۍ چې د سعودي استخباراتو پورې تړاو لري، د داسې ویډیوګانو خپرولو ته دوام ورکړی چې پکې ښکاري بهرني جنګیالي چې ویل کېږي زیاتره یې “کولمبیایان” دي د صومال په بورتلاند سیمه کې د اماراتو یوې ځانواکې اډې ته انتقالېږي.
متحده عربي امارات هلته یوه نظامي اډه لري چې “بصوصو” نومېږي.
یاده اډه د صومال د سواحلو په څنډو کې، د عدن خلیج ته مخامخ، د باب المندب له لورې پرته ده.
تر اوسه پورې دا نه ده څرګنده چې د اماراتو دا نوې خوځښت ولې ترسره کېږي، خو دا عمل له هغو راپورونو سره یو ځای شوی چې پکې ویل شوي امارات د اسرائیلي رادارونو نصبولو ته هم مخه کړې. او داسې ښکاري چې امارات غواړي په یمن کې د ځمکنۍ جګړې له لارې بريد وکړي.
امریکايي ورځپاڼې وال سټریټ ژورنال راپور ورکړی چې سعودي عربستان د اماراتو دا ګام نه تاییدوي او ورسره مخالفت لري.
پخوا رسنیو راپور ورکړی و چې متحده عربي امارات د ۸۰ زرو عسکرو د راجلبولو هڅې کوي، ترڅو د یمن د لوېدیځو سواحلو پر حدیده بندر برید وکړي او هغه تر خپل کنټرول لاندې راولي.
له بله پلوه د انصارالله د سیاسي دفتر غړي محمد البخیتي، د یمن پر ضد د اماراتي برید پلان ته غبرګون کې پپ درېیو جبهاتو کې جګړې ته چمتوالی ښودلی.
په همدې تړاو د انصارالله د سیاسي دفتر غړي محمد البخیتي ويلي، چې یمن چمتو دی په یو وخت کې په درېیو جبهاتو – داخلي، سیمهییزه او نړیواله – جګړه وکړي، تر څو د غزې د ملاتړ عملیات دوام ومومي. هغه د سعودي-اماراتي ائتلاف ملاتړو ته د داخلي کړکېچ له هر ډول لوړولو څخه خبرداری ورکړ.
البخیتي وویل: “د امریکا لاسپوڅي هڅه کوي چې سیمهییزې او کورنيو جبهو کې احساسات راوپاروي.” او زیاته یې کړه:”موږ خپلو وروڼو ته په غزه کې ډاډ ورکوو چې زموږ د هغوی ملاتړ کوونکي پوځي عملیات به د الله په مرسته دوام ومومي، حتی که اړ شو چې په درېیو جبهاتو جګړه وکړو – نړیواله، سیمهییزه او کورنۍ نو هيڅ به شاته نه شو.”
څارونکي وایي، دا د هغه پلان هڅه ده چې د یمن هغه عملیات ودرول شي چې د فلسطین د مظلوم ملت ملاتړ کوي.
د يادونې ده، په ۲۰۱۵ کال کې چې سعودي عربستان او اماراتو د یمن پر ضد جګړه پیل کړه، هغوی له بهرنیو مزدورانو (چې پکې کولمبیایان هم شامل وو) څخه کار اخیستی و، خو دا جګړه له سترې ناکامۍ سره مخ شوه.
