کابل ټکی کام (سه شنبه، ۱۶ غویی، ۱۴۰۴ل)
د حماس اسلامي غورځنګ یو لوړپوړي غړي محمود مرداوي د الجزیرې خبري شبکې سره خبرو کې د اسراییل له لوري د غزې د نیولو لپاره هر ډول طرحه رد کړه.
ښاغلي مرداوي ویلي، د ګواښ او یا د فلسطینیانو د ټولوژنې له لارې د امتیاز ترلاسه کولو په موخه به د اسراییلو هر ډول هڅې له ماتې سره مخ شي.
نوموړي زیاته کړې چې حماس به له اسراییلو سره یوازې هغه هوکړه ومني چې بشپړ اوربند او له غزې څخه د ټولو اسراییلي سرتېرو وتلو ته لاره هواره وي.
دا په داسې حال کې ده، چې د اسراییلو کابینې د غزې د بشپړ نیولو طرحه تائید کړې.
د ویلو ده، چې د اسراييلو لومړي وزیر نتنیاهو ویلي، پرېکړه یې کړې چې غزه کې قوي عملیات ترسره کړي، ترڅو حماس له منځه یوسي او دا به یرغمل شویو له ازادۍ سره مرسته وکړي.
