کابل ټکی کام (پنجشنبه، ۱۸ غویی، ۱۴۰۴ل)
د زابل ولایت د عامې روغتیا مسوولين وايي، چې د دغه ولایت د ولایتي روغتون د نوې ودانۍ پاتې چارې د ۱۹.۵ میلیونه افغانیو په لګښت بشپړې او رسماً ګټې اخیستنې ته وسپارل شوې.
د عامې روغتيا وزارت په يوه خبرپاڼه کې ويلي، چې د دغه روغتون چارې د ياد وزارت له لوري د دوو میاشتو په موده کې ترسره شوې او د یو لړ ځانګړو مراسمو په ترڅ کې چې د عامې روغتیا وزارت د مالي او اداري چارو مرستیال، ملا بخت الرحمن شرافت، د روغتون مسؤلینو او روغتیايي کارکوونکو ګډون پکې درلود، پرانیستل شوې.
ښاغلي شرافت په خپلو خبرو کې وویل، وزارت هڅه کوي چې د هېواد په ټولو سیمو کې د روغتیايي خدماتو اساسي بنسټونه پیاوړي کړي او خلکو ته معیاري، عادلانه او اغېزمن روغتیايي خدمات ورسوي.
نوموړي دا پروژه د عامې روغتیا د پراخې برنامې یوه مهمه برخه وبلله او ټینګار یې وکړ، چې وزارت به د نورو نيمګړو روغتیايي تاسیساتو د بشپړولو لپاره هم هڅې جاري وساتي.
