کابل ټکی کام (جمعه، ۱۹ غویی، ۱۴۰۴ل)
د پاکستان د پوځ چارواکي وايي، چې د هند له لوري د پولې پر اوږدو ترسره شوي بریدونه یې په وخت سره شنډ کړي او د هېواد خاورې ته د هند د هر ډول تېرېدنې مخه یې نیولې ده.
د پاکستان د پوځ د عامه اړیکو ریاست (ISPR) په خپره شوې خبرپاڼه کې ویلي، چې تېره شپه هندي ځواکونو هڅه وکړه څو د کنټرول کرښې (LoC) په اوږدو کې پوځي تحرکات پیل کړي؛ خو د پاکستان پوځ یې پر وخت ځواب ورکړ او د هغوی پلانونه یې شنډ کړل.
په خبرپاڼه کې راغلي، چې د پاکستان پوځ د ملي حاکمیت او ځمکنۍ بشپړتیا دفاع ته ژمن دی، او که هند دا ډول پاروونکي اقدامات تکرار کړي، نو دوی به یې قوي ځواب ورکړي.
د سیمهییزو سرچینو په وینا، د دواړو خواوو پر یو بل د درنو وسلو ډزې شوي؛ خو د پاکستان وسله وال پوځ په مؤثره توګه د هند بریدونه پر شا تمبولي دي.
په سیمه کې اوس هم تاوتریخوالی روان دی،؛خو د پاکستان دفاعي چارواکو ډاډ ورکړی، چې د هېواد امنیتي وضعیت تر کنټرول لاندې دی.
یاده دې وي، چې د هند او پاکستان تر منځ له ډېرې مودې راهیسې د کشمیر پر سر شخړې روانې دي، او وخت ناوخت د کنټرول کرښې په اوږدو کې دا ډول نښتې رامنځته کېږي
