ژباړه او ترتیب: د کابل ټکی خبریال/ وحيد افغان
په داسې حال کې چې د اسلامي او عربي نړۍ له صهیونیستي رژیم سره سیاسي او استخباراتي ترینګلتیا دوام لري، یو تازه راپور د یوې نوې استخباراتي دسیسې پرده پورته کړې، چې پکې د نړۍ د یوه مشهور موبایل تولیدوونکي، سامسونګ، نوم هم یاد شوی دی.
راپور وایي، چې سامسونګ په ۲۰۲۲ کال کې له یوې صهیونیستي کمپنۍ (IronSource) سره یو تړون کړی، چې له مخې یې د منځني ختیځ او شمالي افریقا هېوادونو کاروونکو ته په سامسونګ موبایلونو کې یو خاص اپلیکېشن (AppCloud) نصب شي، هغه هم پرته له دې چې کاروونکي ترې خبر او یا یې موافق وي.
د AppCloud له لارې د معلوماتو ټولونه
نوموړی اپلیکېشن (AppCloud) د “Aura” په نوم یوه بله برنامه نصبوي، چې کاروونکو ته د مختلفو اپلیکېشنونو د نصب وړاندیز کوي، خو تر شا یې اصلي موخه د کاروونکو د شخصي معلوماتو راټولول دي. د راپورونو له مخې، دا برنامه د کاروونکي IP، بایومتریک معلومات (لکه د ګوتې نښه)، د آلې مشخصات او نور مهم معلومات ټولوي، چې دا هر څه د یو شخصې او دقیقې پېژندنې لپاره کارېدلی شي.
په نښه شوې سیمې او وسایل
د “Smex” په نامه د بشري حقونو مدافع سازمان، چې دا راپور یې خپور کړی، وایي چې دا تړون د سامسونګ د A او M لړۍ موبایلونو لپاره ځانګړی شوی، کوم چې نسبتاً ارزانه او منځني قېمت لرونکي وسایل دي، او زیاتره یې د منځني ختیځ، شمالي افریقا او اسلامي هېوادونو په بازارونو کې رانیول کېږي.
په راپور کې ویل شوي چې دا اپلیکېشن د هغو سامسونګ موبایلونو کې مخکې له مخکې نصب وي، کوم چې د تړون له نېټې وروسته تولید شوي وي، خو په زاړه نسل وسایلو کې هم د سافټویر له نوي کېدو سره یو ځای په پټه توګه نصبېږي.
د اپلیکېشن له منځه وړل، نږدې ناممکنه
که څه هم سامسونګ کاروونکو ته دا اجازه ورکړې چې له تنظیماتو یې غیر فعال کړي، خو تخنیکي څېړنې ښيي چې برنامه په شالید (background) کې فعال پاتېږي. برسېره پر دې، د دې اپلیکېشن حذف کول ساده نه دي؛ د حذف غوښتنه د یو فورم ډکولو ته اړتیا لري، چې اصلاً نه دی موجود، او یوازې د Android Debug Tool کارونې یا د موبایل Root کولو له لارې یې له منځه وړل ممکن دي، کوم چې عادي کاروونکي ورته لاسرسی نه لري.
جاسوسي، استخبارات او سایبري جګړه
د سایبري امنیت متخصصین خبرداری ورکوي چې دا ډول تړونونه د یوې لویې ستراتیژیکې دسیسې برخه ده. راپور وایي چې صهیونیستي رژیم د ټکنالوژۍ او استخباراتي وسایلو له لارې غواړي د سیمې د خلکو، حکومتونو او بازارونو په اړه معلومات تر لاسه کړي، تر څو د هر احتمالي شخړې پر مهال له مخکې چمتو وي او خپل ګټې خوندي کړي.
سره له دې چې سامسونګ تر دې دمه په رسمي توګه د راپور په اړه غبرګون نه دی ښودلی، خو د بشري حقونو سازمانونه، د معلوماتو خوندیتوب ادارې او فعالان له خلکو غواړي چې د خپلو وسایلو فعالیتونه وڅاري، له بېباوره اپلیکېشنونو ځان وساتي، او د خپلو شخصي معلوماتو د خونديتوب لپاره جدي ګامونه واخلي.
