کابل ټکی کام (يکشنبه، ۱ چنګاښ، ۱۴۰۴ل)
د هرات سیمهییزو چارواکو د هغو مهاجرینو د ملاتړ لپاره د بیړني کمېسیون د جوړېدو پرېکړه کړې، چې له ایران څخه هېواد ته راګرځي.
دا پرېکړه د والي شیخ مولانا اسلامجار په مشرۍ د صنعتکارانو، سوداګرو او اتحادیو د استازو په ګډه غونډه کې وشوه.
په غونډه کې د خصوصي سکتور استازو د محلي ادارې له هڅو ملاتړ اعلان کړ او ډاډ یې ورکړ چې د مهاجرینو د کارموندنې، په ځانګړې توګه د صنعتي ښارګوټي په برخه کې، پراخه همکاري کوي.
والی له خصوصي سکتور وغوښتل چې د خوړو، استوګنې او لومړنیو مرستو په برابرولو کې هم ونډه واخلي.
په پای کې، والي اړوندو ادارو ته لارښوونه وکړه چې د دولتي او خصوصي سکتور له استازو یو ګډ بیړنی کمېسیون جوړ کړي.
