کابل ټکی کام (یکشنبه، ۱ چنګاښ، ۱۴۰۴ل)
د ایران وسلهوالو ځواکونو اعلان کړی، چې پر اشغالي فلسطین وروستي توغندويي او ډرون بریدونه په بریالیتوب پای ته رسېدلي دي. د ایران دفاع وزارت ویلي، چې ټاکل شوي اهداف په دقیقه توګه په نښه شوي او د دښمن مهم نظامي تاسیسات ویجاړ شوي دي.
د سپاه پاسداران یو جګپوړي قوماندان ویلي، “د وروستیو عملیاتو پایلې ښيي چې زموږ نظامي وړتیاوې د سیمې د هر ډول تهدید پر وړاندې اغېزمنې دي.” نوموړي زیاته کړې چې دا بریدونه د ایران د دفاعي حق یوه برخه ده او راتلونکې هر ډول تېری به له سخت غبرګون سره مخ شي.
بلخوا، نړیوالو رسنیو راپور ورکړی، چې ایران د منځني ختیځ په مختلفو هیوادونو کې د امریکایي ځواکونو پر اډو برید ته چمتووالی بشپړ کړی. د راپورونو له مخې، ایران خپلې ستراتیژیکې وسلې، توغندي، او بېپېلوټه الوتکې د اړوندو هدفونو لپاره ځای پر ځای کړي دي.
د امریکا دفاع وزارت تر اوسه د دغو راپورونو په اړه رسمي غبرګون نهدی ښودلی، خو سیمهييزو سرچینو خبر ورکړی، چې امریکایي ځواکونو په عراق، سوریه، اردن او بحرین کې په لوړه کچه امنیتي تدابیر نیولي دي.
یاده دې وي، چې دا پېښې د ایران او اسرائیلو ترمنځ د تاوتریخوالي په دوامداره لړۍ کې نوی فصل بلل کېږي، او څارونکي وايي، که وضعیت همداسې دوام وکړي، نو ښایي د سیمې پراخ جنګ ته لاره هواره شي.
