کابل ټکی کام (یکشنبه، ۱ چنګاښ، ۱۴۰۴ل)
ځانګړی راپور
په داسې حال کې چې د ایران- اسرائیلو ترمنځ جګړه دویمې اوونۍ ته غځیدلې او امریکایي اشغالګرو تېره شپه د ایراني په اټومي تأسیساتو ناکام بریدونه ترسره کړل. ایران په یوه بیساري اقدام کې د هرمز تنګي د تړلو خبر ورکړ او د امریکایي اشغالګرو پر ضد یې د ځوابي بریدونو خبرداری ورکړی، چې ښایي د نن شپې په اوږدو کې ترسره شي.
په ورته مهال د یمن د وسلهوالو ځواکونو ویاند، برید جنرال یحیی سریع، نن وویل:
> “امریکا د صهیونیستي رژیم د جنایتونو شریک ده او د دې شریکتیا له امله به د یمني توغندیو او ډرونونو هدف وګرځي.”
په ورته وخت کې، ایراني چارواکو د منځني ختیځ په بېلابېلو هېوادونو کې د امریکایي اډو پر ضد د ممکنه ځوابي عملیاتو چمتووالی اعلان کړی دی. د ایران د سپاه پاسداران لوړپوړو چارواکو ویلي چې:
> “که امریکا له صهیونیستي رژیم سره د خپلو شومو اهدافو ملاتړ ته دوام ورکړي، موږ به مجبور شو چې له خپل دفاعي حق څخه ګټه پورته کړو او سیمه کې امریکایي حضور له خطر سره مخ کړو.”
امنیتي سرچینې وايي، د هرمز تنګي تړل به، چې د نړۍ د انرژۍ مهم بحري مسیر ګڼل کېږي، د نړیوالو بازارونو او د امریکا اقتصادي ستراتیژیو ته درانه زیانونه ورسوي.
د سیمې سیاسي شنونکي وایي، دا تحول به د امریکا، ایران، او د مقاومت محور تر منځ تقابل نوي پړاو ته یوسي، او ښایي سیمه د لویې جګړې پر لور ولاړه شي.
