کابل ټکی کام (دوشنبه، ۲ چنګاښ، ۱۴۰۴ل)
ځانګړی راپور- عطاءالله مبارز
تېره شپه د ایران اسلامي جمهوریت له لوري پر صهیونیستي رژیم پراخ او دقیق بریدونه شوي، چې له امله یې د اسرائیلو دفاعي جوړښتونه سخت زیانمن شوي دي. د لومړنیو معلوماتو له مخې، د دغو بریدونو په ترڅ کې د صهیونیستي رژیم د دفاع وزارت ودانۍ، د موساد استخباراتي مرکزونه، او یو شمېر نظامي تأسیسات په نښه شوي دي.
د ایران د سپاه پاسداران انقلاب اسلامي ویاند ویلي، دا بریدونه د ایران د ملي امنیت د دفاع، او د فلسطین د مظلوم ملت د ملاتړ په موخه ترسره شوي، او د دقیقو استخباراتي معلوماتو پر اساس یې دښمن ته درانه زیایونه اړولي دي.
🔹 په نښه شوي مهم اهداف:
د اسرائیلو دفاع وزارت ودانۍ
د استخباراتو (موساد) د فعالیت مرکزي دفترونه
د هوايي دفاع قرارګاه
د سایبري جنګ مرکزونه
د وسلو تولید یو شمېر فابریکې
دوه پوځي هوایي ډګرونه او د توغندیو زېرمې
ځینې محلي سرچینې وايي، چې د بریدونو له امله د تل ابیب، حیفا، او بئرالسبع ښارونو کې د شپې له خوا د درنو چاودنو غږونه اورېدل شوي، او پراخې اور لګیدنې رامنځته شوي دي.
د اسرائیلو پوځي او حکومتي چارواکي تر اوسه د بریدونو دقیق جزییات نهدي خپاره کړي، خو غیر رسمي سرچینې وايي، چې په لسګونو عسکر وژل شوي او ګڼ شمېر نور ټپیان دي. همداراز د وسلو مهمې زېرمې، ډرون مرکزونه، او یو شمېر ستراتیژیک ځایونه ویجاړ شوي دي.
د ایران دفاعي چارواکو ګواښ کړی، که اسرائیل خپلو تیريو ته دوام ورکړي، نو لا سخت، هدفمند او نابودوونکي بریدونه به پرې وکړي.
د ویلو ده، چې ایران دغه بریدونه داسې مهال کړي، چې له تېرې یوې نیمې اوونۍ راهیسې سیمه د یوې پراخې جګړې د خطر له سیوري لاندې ده، او د مقاومت ډلې (حماس، حزبالله، انصارالله) هم له ایران سره بشپړ همغږي ښيي. نړیوالو د وضعیت له خرابېدو اندېښنه څرګنده کړې، خو د اسلامي نړۍ د عامو خلکو ترمنځ دا بریدونه د خوښۍ، افتخار او یووالي نښه بلل شوي.
