(کابل ټکی کام، دوشنبه، ۱۶ چنګاښ ۱۴۰۴):
د امریکا پخواني ولسمشر ډونلډ ټرمپ په خپلو تازه څرګندونو کې د برېکس (BRICS) او د دې ډلې له ملاتړو هېوادونو سره د سختو اقتصادي اقداماتو ګواښ کړی دی. ټرمپ ویلي، چې هر هغه هېواد چې د برېکس له «امریکا ضد پالیسیو» سره یوځای شي، پر هغه به لس سلنه اضافي ماليه ولګول شي او په دې پالیسۍ کې هېڅ استثنا نشته.
د ټرمپ دغه څرګندونې په داسې حال کې مطرح شوې، چې د برېکس هېوادونو اوولسمه سرمشریزه د برازیل په ریو دي جنیرو ښار کې روانه ده او پکې د امریکا د سوداګریزو پالیسیو په اړه پراخ بحثونه شوي دي.
د روسیې ولسمشر ولادیمیر پوتین په خپله وینا کې د برېکس هېوادونو تر منځ د لا قوي اقتصادي همکاریو غوښتنه کړې او د ټرمپ ګواښونه یې د ګډو هڅو پر وړاندې خنډ بللي دي.
د برېکس هېوادونو مشرانو د ټرمپ دا ګواښونه په کلکو ټکو غندلي او دا یې د نړۍوال اقتصاد لپاره «زیان رسوونکي» او د نړۍوالې سوداګرۍ د سازمان (WTO) له اصولو سره په ټکر کې بللي دي.
دوی ټینګار کړی، چې دا ډول یو اړخیزې او غیرمنصفانه پالیسیانې د نړۍوالې سوداګرۍ ثبات او د عادلانه اقتصادي جوړښت پر وړاندې جدي ګواښ دی.
