(کابل ټکی کام، دوشنبه، ۲۳ چنګاښ ۱۴۰۴):
د پکتیکا ولایت مرکز ښرنې ښاروالۍ له لوري د ۱۴۰۴ مالي کال د پراختيايي پلان په چوکاټ کې د ۱۶ ميليونه او ۳۰۰ زره افغانیو په ارزښت د دوو مهمو پروژو چارې په رسمي ډول پیل شوې. په دې پروژو کې د کټواز پر لوري ۵۰۰ مترو په اوږدوالي او ۴۰ مترو په سور يو دوه طرفه سړک جوړول او د ملکي روغتون پر سړک د کټارو او ګلدان کربونو جوړول شامل دي.
د پکتیکا ولایت مرستیال والي مولوي مخدوم عبدالسلام سعادت د پروژو د پرانیستې پر مهال وویل، پکتیکا د پراختيايي چارو په برخه کې د پرمختګ پر لور روان دی، او روان کال به د ګڼو نورو لويو او وړو پروژو چارې هم پيل او بشپړې شي. نوموړي زیاته کړه، چې د ښاروالي لپاره يې د ۳۵ ميليونه افغانیو په ارزښت د امکاناتو د ترلاسه کولو وړاندیز هم کړی دی، څو د ښاريانو لپاره نوره اسانتیا برابره شي.
د ښرنې ښار اوسېدونکي د دې پروژې له پیل څخه خوښي څرګنده کړې او هیله يې ښودلې چې ښاروالۍ به ورته نورې پرمختيايي پروژې هم عملي کړي. د هغوی په باور، دا ډول کارونه به د ښار ښکلا، پاکۍ او پرمختګ لپاره مهم ګام وي او د خلکو ورځني ژوند ته به مثبته اغېزه ورسوي.
