کابل ټکی کام (دوشنبه، ۲۳ چنګاښ، ۱۴۰۴ل)
د حماس اسلامي غورځنګ د پوځي څانګې “القسام” لېوا د غزې تړانګې ختیځ کې د صهیونیستي پوځیانو پر ضد یو پیچلی کمین ترسره کړی، چې له امله یې ګڼو اسرائیلي پوځیانو ته مرګ ژوبله اوښتې ده.
د حماس پوځي څانګې “عزالدین القسام” لېوا سرچینو رسنیو ته ویلي، چې دغه برید د “بیت حانون” په سیمه کې ترسره شوی، چې د مقناطیسي ماینونو، لاسي بمونو او درنو وسلو په مرسته د اشغالګرو پوځیانو یو کاروان په نښه شوی دی.
د القسام لېوا سرچینو د مقاومت اړوند “المیادین” تلویزیوني شبکې ته ویلي،
چې برید دوو پړاوونو کې پلان شوی و،چې لومړی د ماین چاودنې او بیا پکې له درنو وسله کار اخیستل شوی دی.
که څه هم اسرائیلي پوځ تر دې دمه برید کې د اوښتې مرګ ژوبلې په اړه څه نه دي ویلي؛ خو ځینو عبراني سرچینو خپل لوري ته د اوښتو تلفاتو پخلی کړی؛ خو د شمېرو په اړه یې څه نه دي ویلي.
په ورته وخت کې د اسراییلو د سیاسي او نظامي مشرانو ترمنځ د جګړې د دوام او اوربند پر موضوع ناندرۍ زیاتې شوي دي.
د یادونې وړ ده، چې د غزې جګړه له تېرو ۲ کلونو راهیسې روانه ده او هره ورځ پکې دواړو خواوو ته مرګ ژوبله اوړي، خو د نړیوالو هڅو د دایمي اوربند لپاره لا هم کومه پایله نه ده ورکړې.
