کابل ټکی کام (یکشنبه، ۱۹ زمری، ۱۴۰۴ل)
د یمني ځواکونو ویاند جنرال یحیی سریع په خپلو تازه څرګندونو کې صهیونیستي ترهګر ريژیم ته خبرداری ورکړی، چې د غزې محاصره پای ته ورسوئ کنه له ویجاړونکو بریدونو سره به مخ شئ.
نوموړي چې د مقاومت اړوند “المیادین” تلویزیوني شبکې سره یې خبرې کولې وویل: موږ په اسراییلي نیواکګرو غږو کوو، چې د غزې کلابندي پای ته ورسوي کنه زموږ ځواکونه به په مستقیم ډول جګړې کې ښکیل شي او غزې ته به ننوځي.
نوموړي په اسلامي هیوادونو هم غږ کړی، چې د صهیونیستانو پر وړاندې د فلسطیني ولس سره څنګ په څنګ ودریږي، یو تلپاتې اوربند ته زمېنه برابره کړي او هڅه دې وکړي، چې غزې ته د خوراکي او نور د اړتیا وړ توکي ورسیږي.
د جنرال یحیی سریع په خبره تر اوسه یې پر اسراییلو سلګونه ځله بریالي عملیات ترسره کړي او یوځل بیا یې خبرداری ورکړی، چې هره هغه بېړۍ به هدف وګرځوي، چې په مستقیم او غیر مستقیم ډول د اشغالي فلسطین بندرونو ته تګ-راتګ کوي.
