نږدې څلور کاله کېږي چې اسلامي امارت د افغانستان د واک واګې په لاس کې لري. په دې موده کې که څه هم د امریکا او لویدیځ له لوري د سیاسي او اقتصادي بندیزونو فشارونه دوام لري، خو واقعیت دا دی چې هېواد د امنیت، اقتصادي پرمختګ او نړیوالو اړیکو په ډګرونو کې د پام وړ لاسته راوړنې لري. د امنیت ټینګېدل او د سیاسي ثبات تامین هغه بنسټ دی چې هر ډول پرمختګ پرې ولاړ وي، او نن افغانستان د همدې بنسټ په برکت د اقتصادي نوښتونو په لور د باور وړ ګامونه اخلي.
د امنیت تر سیوري لاندې، اسلامي امارت د زېربنایي پروژو په برخه کې سترې لاسته راوړنې لري. د قوشتیپې کانال پروژه، چې د هېواد د کرنې په برخه کې د انقلاب حیثیت لري، د ځان بسیاینې لپاره یو تاریخي ګام دی. همدارنګه د کابل–کندهار لویه لاره د هېواد د ترانسپورتي شبکې مهمه کړۍ ګڼل کېږي چې رغونه یې د سوداګرۍ او تګ راتګ اسانتیاوو ته پراخې دروازې پرانیزي. د بندونو رغونه، د اوبو د مهار هڅې، او د برېښنا او انرژۍ پروژې هغه عملي ګامونه دي چې د هېواد د اقتصادي بنسټونو د پیاوړتیا لپاره اخیستل شوي دي.
په دې لړ کې وروستۍ ستره لاسته راوړنه، د اسلامي امارت د اقتصادي معاونیت او عزيزي ګروپ تر منځ د ۱۰ میلیارده امریکايي ډالرو په ارزښت د برېښنا د سترې پروژې تړون دی. دا پروژه به نه یوازې د انرژۍ په برخه کې د افغانستان اړتیاوې پوره کړي، بلکې هېواد به د سیمې په کچه د انرژۍ برخه کې پر یوه مهم لوبغاړي بدل کړي. په دیپلوماټیک ډګر کې هم مهم پرمختګونه شوي دي، چې له هغې جملې څخه د روسیې له لوري د اسلامي امارت رسمي پېژندنه د نړیوال دریځ د پیاوړتیا او د سیاسي انزوا د ماتولو یوه مهمه لاسته راوړنه ګڼل کېږي. دا پرمختګ د دې امکان زیاتوي چې نور هېوادونه هم د افغانستان له نویو واقعیتونو سره د تعامل لاره خپله کړي.
که څه هم د بندیزونو او اقتصادي محدودیتونو سیوري لا هم پر هېواد خپور دی، خو د عملي کار، شفافیت او ملي ارادې دوام کولی شي دغه سیوري کم رنګه کړي. د افغانستان پرمختګ یوازې د افغانانو لپاره نه، بلکې د سیمې د ثبات، سوداګرۍ او متقابلو ګټو لپاره هم حیاتي ارزښت لري. نړۍ باید د افغانستان د نوې مرحلې منلو ته چمتو شي او د اقتصادي او ډیپلوماټیکو همکاریو دروازې پرانیزي، څو دا هېواد خپلې پیاوړتیا او پرمختګ لارې ته په لا ډاډه زړه ګامونه پورته کړي.
