کابل ټکی کام (دوشنبه، ۳ وږی، ۱۴۰۴ل)
د خانيونس په ناصر روغتون کې نن دوشنبې په سهار د اسرائیلي ځواکونو په هوايي برید کې لږ تر لږه ۱۵ تنه شهیدان شوي چې پکې څلور خبریالان او یو د ملکي دفاع ادارې روغتیايي کارکوونکی هم شامل دی او لس تنه نور ټپیان شوي دي.
ځايي سرچینو ویلي، اشغالګرو لومړی د روغتون د بیړنیو حالاتو او استقبالي څانګې درېیم پوړ باندې بمبار وکړ چې د رویټرز خبریال حسام المصري په ګډون یو تن پکې شهید شو. څو دقیقې وروسته، د خلکو او خبریالانو د ژغورنې پر مهال ياد ځای یو ځل بیا په نښه شو.
په پېښه کې څلور خبریالان ــ حسام المصري (رویټرز)، محمد سلامه (الجزیره)، مریم ابو دقه (اندپندنت عربي او AP)، او معاذ ابو طه (NBC) ــ خبريالانو خپل ژوند له لاسه ورکړ. د فلسطیني چارواکو په وینا، د دې سره په غزه کې د شهیدانو شویو خبریالانو شمېر ۲۴۴ تنو ته ورسېد.
د غزې د حکومت رسنیز دفتر او نړیوالو ژورنالیستي ټولنو د برید غندنه کړې او له نړیوالې ټولنې څخه يې د دې جنایتونو پر وړاندې د اقدام کولو غوښتنه کړې ده.
