کابل ټکی کام (سه شنبه، ۴ وږی، ۱۴۰۴ل)
د ترکيې ولسمشر “رجب طيب اردوغان” يو ځل بيا د صهیونیستي د لومړي وزير بنيامين نتنياهو پر ظالمانه کړنو سختې نيوکې کړې دي.
ولسمشر اردوغان په خپلو تازه څرګندونو کې ويلي، چې د نتنياهو حکومت نه يوازې دا چې د انسانيت ټول ارزښتونه له منځه وړي، بلکې خپلو وحشيانه تېریو او بربريت ته یې هم دوام ورکړی دی.
هغه زياته کړه:
> «صهیونیستي رژيم هره ورځ پر بې دفاع فلسطينيانو وحشت کوي، ښځې او ماشومان شهیدانوي، روغتيايي مرکزونه، ښوونځي او جوماتونه نړوي. د دوی کړنې له ټولو نړيوالو قوانينو او بشري ارزښتونو څخه ښکاره سرغړونه ده».
د ترکيې ولسمشر ټينګار وکړ، چې د نړۍ ټول ولسونه، په ځانګړي ډول اسلامي هېوادونه، بايد د دغه رژيم پر وړاندې عملي ګامونه پورته کړي او د فلسطيني ولس ملاتړ وکړي.
اردوغان دا هم وويل چې ترکيه به د فلسطينيانو ملاتړ ته دوام ورکوي او د صهیونیستي رژيم د وحشت پر وړاندې به چوپه پاتې نه شي.
