کابل ټکی کام (سه شنبه، ۱۴ وږی، ۱۴۰۴ل)
د یمن د انصارالله اسلامي غورځنګ مشر “سید عبدالملک بدرالدین حوثي” ویلي، چې د غزې له مظلومو خلکو سره به تر وروستۍ سلګۍ ولاړ وي.
نوموړي په خپلو تازه څرګندونو کې زیاته کړې، چې د صهیونیستي رژیم وحشیانه بریدونه به د مقاومت روحیه کمزورې نه کړي، بلکې د امت د یووالي او غچ اخیستنې اراده به لا پیاوړې کړي.
حوثي ټینګار کړی، چې یمني ولس او وسله وال ځواکونه به د خپل ټول توان سره له فلسطیني ملت ملاتړ خپل ملاتړ ته دوام ورکوي او دا مبارزه به تر فتحې یا شهادت پورې روانه وي.
نوموړي دا څرګندونې په داسې حال کې کړي چې وړمه ورځ صهیونیستي رژیم د یمن د پلازمینې “صنعا” په ځینو وحشیانه هوایي بریدونه وکړل، چې په پایله کې یې د ښځو او ماشومانو په ګډون ګڼ شمېر کسان شهیدان او ټپیان شول.
حوثي د دې بریدونو په غبرګون کې وویل، چې د یمن ځواب به سخت او پرېکنده وي او د دښمن دا تېری به بې ځوابه پاتې نه شي.
