کابل ټکی کام (يکشنبه، ۹ وږی ۱۴۰۴):
د غور سیمهییز چارواکي وايي، د نړیوال بانک په مالي ملاتړ د دغه ولایت په بېلابېلو ولسوالیو کې د څښاک د اوبو شپږو شبکو د جوړېدو چارې پیل شوې دي.
د یادو پروژو ټول لګښت له ۴۰ میلیونه افغانیو ډېر اټکل شوی چې د کلیو د بیارغونې او پراختیا ریاست په همغږۍ عملي کېږي.
چارواکي زیاتوي، د دغو شبکو په بشپړېدو سره به شاوخوا ۱۴۰۰ کورنۍ د څښاک پاکو اوبو ته لاسرسی پیدا کړي او لسګونو کسانو ته به د کار موقتې اسانتیاوې هم رامنځته شي.
د یادو سیمو اوسېدونکي له دغې پروژې هرکلی کوي او وایي چې له کلونو راهیسې د څښاک د اوبو له کمښت سره مخ وو او هیله لري چې د اوبو د نویو شبکو په جوړېدو سره به يې د ژوندانه ستونزې په اساسي توګه حل شي.
