کابل ټکی کام (جمعه، ۱۴ لیندۍ، ۱۳۹۹ل)
د امریکا منتخب ولسمشر “جوبایډن” په خپلو تازه څرګندونو کې ویلي، چې اجازه نه ورکوو ایران اټومي وسلې تر لاسه کړي.
بایډن چې، د سي ان ان تلویزیوني شبکې سره یې خبرې کولې، زیاته کړه: «ایران سره د اټومي پروګرام په اړه خبرې او تړون کیدای شي خو دا معنی نه لري چې هغوی دې اټومي وسلو ته لاس رسی پیدا کړي، نړۍ نه غواړي چې ایران اټومي وسلې ولري.»
نوموړي په ولسمشر ټرمپ نیوکه وکړه چې ایران سره یې د اوباما په وخت کې شوې اټومي تړون مات کړ، ټرمپ ستره تیروتنه وکړه چې له یاد تړون څخه ووت د تړون له مخې ایران اجازه نه لرله چې د اټومي پروګرام اړوند فعالیتونه پراخ کړي خو اوس په ډاډه زړه کولی شي په دې برخه کې خپلو هڅو ته پراختیا ورکړي.»
د بایډن په خبره لکه څنګه چې ما د انتخاباتي کمپاینونو پر مهال ویلي و بیا یې تکراروم لومړی کار به مې دا وي چې ایران سره شوی تړون بیرته اعاده کړم.
باید وویل شي چې څه موده وړاندې د ایران ولسمشر حسن روحاني ویلي و که امریکا وغواړي ایران تیار دی چې د اوباما د حکومت پرمهال د اټومي پروګرام د نه پراختیا تړون ته ور وګرځي.
