کابل ټکی کام (دوشنبه، ۱۰ وږی ۱۴۰۴):
د ریاستالوزراء اقتصادي مرستیال ملا عبدالغني برادر اخوند وايي، د هېواد اقتصادي وده د عامه او خصوصي سکتور ګډو پانګونو پورې تړلې ده او امارت اسلامي د خصوصي سکتور له هر ډول پانګونې ملاتړ کوي. نوموړي دا څرګندونې په تخار کې د سپین زر تجارتي ښارګوټي د پرانیستې او د جوړېدو د چارو د پیل پر مهال وکړې.
د یاد ښارګوټي په جوړېدو ټولټال دوه میلیارده او ۴۵۰ میلیونه افغانۍ د عامه او خصوصي سکتور له لوري پانګونه کېږي.
د اقتصادي معاونیت خبرپاڼه کې راغلي چې دغه ښارګوټی به په ۶۰ جریبه ځمکه جوړ شي او د غلو، میوو، سبو، ساختماني موادو او دارو درملو لپاره ځانګړي مارکېټونه به ولري.
د اقتصادي مرستیال په وینا، د سپین زر ښارګوټی به په ټولیز ډول له دوو زرو ډېر دوکانونه ولري چې د زرګونو خلکو لپاره د کار زمینه به پکې برابره شي.
نوموړي همدارنګه د خصوصي سکتور له لوري د موټرو خرڅلاو، موټر شویي، نجارۍ دوکانونو او ساختماني شرکتونو د پروژو پرانیسته هم وکړه چې ۱۸۰ میلیونه افغانۍ پانګونه پرې شوې ده.
