کابل ټکی کام (دوشنبه، ۱۰ وږی ۱۴۰۴):
د اسلامي امارت د زعیم شيخ الحديث هبة اللّٰه اخندزاده د حکم پر اساس د یو شمېر وزارتونو، قول اردوګانو او ولایتونو په کچه نوې ټاکنې او بدلونونه اعلان شوي دي.
د بدلونونو له مخې، د لغمان پخوانی والي شیخ شیر احمد حقاني د اطلاعات او فرهنګ د وزیر په توګه وټاکل شو، او د دغه وزارت مخکنی وزیر ملا خیرالله خیرخواه د میدان وردګ والي شو. همداراز د میدان وردګ پخوانی والي قاري محمد بختیار معاذ د لغمان والي په توګه ټاکل شوی دی.
په ورته وخت کې د ۳۱۳ مرکزي قول اردو مرستیال ملا محمد حافظ مجاهد د فراه والي شو او د فراه پخوانی والي مولوي غوث الدین رهبر د همدې قول اردو مرستیال وټاکل شو.
دغه راز، قاري محمد نسیم عزت د جوزجان ولایت د مرستیال والي په توګه، حاجي شیرعلي جندالله د پکتیا د امنیه قومندان په توګه، او ملا عبدالشکور بریالی د ۲۰۵ البدر قول اردو د دوهمې پلي لواء د قومندان په توګه ټاکل شوي دي.
مولوي نورالدین د ۲۰۹ الفتح قول اردو د لومړۍ پلي لواء د قومندان په توګه او مولوي محمد عمر مخلص د کابل ښار د دریمې امنیتي حوزې د آمر په توګه خپل نوي مسؤلیتونه پیلوي.
یاد بدلونونه د امارت د ادارې د لا ښه سمبالښت او خدمتونو د اغېزمنتیا په موخه شوي دي.
