برېتانیې د کونړ زلزله ځپلو لپاره یو میلیون پونډه مرسته اعلان کړه
کابل ټکی کام (سه شنبه، ۱۱ وږی ۱۴۰۴):
د برېتانیاې د بهرنیو چارو وزارت خبر ورکړی چې د افغانستان په ختیځ کې د وروستۍ خونړۍ زلزلې د بشري اړتیاوو د پوره کولو لپاره یو میلیون پونډه ځانګړي شوي دي.
په خبرپاڼه کې ویل شوي، چې دغه مرستې به د ملګرو ملتونو د نفوس صندوق (UNFPA) له لارې ولګول شي.
د معلوماتو له مخې، له دې مرستو څخه به ګرځنده روغتیايي ټیمونه جوړېږي، د بېړنیو حالاتو لپاره طبي کېټونه برابرېږي، ښځو ته به د ځانګړو حفظالصحې کېټونه وېشل کېږي او هغو کورنیو ته چې خپل کورونه یې له لاسه ورکړي، د موقتي سرپناه زمینه به برابرېږي.
سرچینو زیاته کړې، چې د دغو مرستو موخه د زلزله ځپلو خلکو لپاره د بیړنیو خدماتو برابرول دي.
