کابل ټکی کام ۲۴وږی/۱۳۹۴
راپور: حماس افغان
د سعودي حکومت د یادې پېښې د وژل شویو حاجیانو له کورنيو سره یو مليون ریال او له ټپیانو سره نيم ميليون ریال مرسته کوي.
همدارنګه هغه ټپیانو سره چې په دغه پېښه کې یې د بدن غړي له لاسه ورکړي، هم یو ميليون ریال مرسته کبږی.
د سعودي پاچا ملك سلمان بن عبدالعزیز د یوه فرمان په ترڅ کې ويلي، چې راتلونکي کال ته به د قربانیانو له کورنۍ څخه د حج لپاره دوه دوه غړي د حرمینو د خادم له لوري مېلمانه وي او حج ته به را بلل کيږي.
دغه راز په فرمان کې راغلي دي، کوم ټپیان چې سږ کال د حج د فریضې له ادا کولو پاتي شوي وي هغوي به هم د خاصو مېلمنو په ډول راتلونکي کال کې حج ته راځي.
ملک سلمان د یادې پېښې د څېړنو لپاره یو کميسیون ټاکلی تر څو دغه موضوع په جدي توګه و څاري او امر يي کړی چې د (بن لادن شرکت) مسئول او نور غړي به د پېښې تر څېړنې پورې ممنوع الخروج وي.
د یادونې وړ ده چې دغه پېښه په حرم کې هغه مهال رامنځ ته شوه کله چې د تېرې جمعې په ورځ ځايي وخت په ۵ بجې او ۱۱ دقیقو د تیزو بادونو له امله یو کرین د مسجد الحرام په یوه برخه را وغورځېده چې د ۱۱۱ تنو د وژل کېدو او د ۲۵۰ تنو د ټپي کېدو لامل شو .
