کابل ټکی کام (چهارشنبه، ۳۰ تله، ۱۴۰۴ل)
د مهاجرینو ستونزو ته د رسېدنې عالي کمېسیون دارالانشاء په خپل راپور کې ویلي، چې د روانې اونۍ د سهشنبې په ورځ د هېواد له بېلابېلو لارو ټولې ۵۹۹ کورنۍ، چې د غړو شمېر یې ۳۲۸۳ تنه کېږي، په اجباري توګه افغانستان ته راستانه شوې او اړین خدمات ورته وړاندې شوي دي.
راپور زیاتوي، چې د هرات د اسلامکلا له لارې ۳۹۲ تنه، د نیمروز د ورېښمو له لارې ۱۷۹ تنه، د کندهار د سپین بولدک له لارې ۲۶۱۴ تنه او د هلمند د بهرامچې له لارې ۹۸ تنه مهاجر ثبت شوي دي.
د کندهار له لارې ۴۰۰ کورنۍ د هېواد دننه بېلابېلو ولایتونو ته لېږدول شوې دي او نږدې ۳،۵ میلیونه افغانۍ د ترانسپورټ کرایه ورکړل شوې ده.
د کمېسیون د معلوماتو له مخې، له ۵۳۷ کورنیو سره نغدې مرستې شوې، ۴۲۲ سیمکارتونه او زرګونه ډوډۍ او اوبه ویشل شوې دي. دغهراز د عامه پوهاوي کمېټې د راستنېدونکو مهاجرینو ترمنځ د هېواد، اسلامي نظام، ښوونې او زغم په اړه د پوهاوي پروګرامونه هم ترسره کړي دي.
