کابل ټکی کام (يکشنبه، ۲۵ لړم، ۱۴۰۴ل)
آریانا افغان هوايي شرکت اعلان کړی چې د ریاستالوزراء د اقتصادي معاونیت د پرېکړې پر اساس یې د ډهلي سکټور لپاره د کارګو ټيټې کرایې له ۱۴۰۴/۰۸/۲۵ نېټې څخه عملي کړي دي.
د نوي میکانېزم له مخې، د یو کیلو صادراتي توکي انتقال په یو امریکايي ډالر او د یو کیلو وارداتي توکي په اتیا سېنټه ترسره کېږي.
د شرکت رئیس ملا بختالرحمن شرافت وايي، آریانا هڅه کوي چې د افغاني تولیداتو نړیوال لېږد په ټیټه بیه اسانه کړي او ملي سوداګرو ته د اعتبار وړ خدمات وړاندې کړي.
اوس مهال آریانا د منظم کارګو الوتنو له لارې د افغانستان بېلابېل صادرات لکه وچه او تازه مېوه، زعفران او غالۍ ګڼو نړیوالو بازارونو ته لېږدوي. شرکت وايي، د ستونزو سره سره یې ملت ته د سهولت ژمنه عملي کړې او ملي سوداګرو ته د ټیټې بیې له لارې نوی فرصت برابر شوی دی.
