کابل ټکی کام (يکشنبه، ۲ لیندۍ، ۱۴۰۴ل)
د افغانستان د فوټبال اتلانو ليګ پنځم پړاو نن د لسو لوبډلو په ګډون پيل شو، چې ټاکل شوې ده د ۲۶ ورځو لپاره دوام وکړي.
د افغانستان د بدني روزنې، اولمپیک او سپورټ لوی رئیس احمدالله وثیق د لیګ پرانیسته د یوه نوي تعهد پیل وباله او ویې ویل، چې ورزشي فدراسیونونه او اداري سټاف د ورزش د ودې لپاره په ګډه او منظم کار بوخت دي په وینا یې وروستۍ ورزشي لاسته راوړنې تصادفي نه دي، بلکې د ورزشکارانو او ادارې د ګډو نه ستړې کېدونکو هڅو پایله ده.
ښاغلي وثیق زیاته کړه، چې اداره به له بشپړ ژمنتیا سره هڅه کوي، څو د افغانستان ورزشي بریاوې لا پیاوړې شي او د افغان ځوان نسل د دوام او ویاړ یوه برخه وګرځي.
