کابل ټکی کام (چهارشنبه، ۱۰ مرغومي، ۱۴۰۴ل)
د افغانستان اسلامي امارت ویاند مولوي ذبیحالله مجاهد وايي، ۲۰۲۵ میلادي کال د اسلامي امارت لپاره د اقتصاد، ډیپلوماسۍ، بنسټیزو پروژو او ټولنیزو خدمتونو له پلوه د پام وړ لاستهراوړنو کال و.
نوموړي د چهارشنبې په ورځ (د مرغومي ۱۰مه) پر خپلې اېکس پاڼې لیکلي، چې تېر کال له بهرنیو هېوادونو څخه شاوخوا ۲ میلیونه او ۸۰۰ زره افغانان او مهاجرین هېواد ته راستانه شوي، چې د اکثریت د ځای پرځای کولو، خدمتونو وړاندې کولو او د ښارګوټو د وېش بهیر په منظم ډول مدیریت شوی دی.
د اسلامي امارت ویاند زیاته کړې، چې د ریاستالوزرا د اقتصادي معاونیت له لوري تېر کال په ټول هېواد کې ۲۲ سترې پروژې یا پیل شوې او یا هم ګټې اخیستنې ته وسپارل شوې او د ۲۰ نورو مهمو پروژو قراردادونه لاسلیک شوي دي.
د هغه په وینا، د سوداګرۍ او صنعت وزارت هم له سیمې هېوادونو سره ګڼ مهم تړونونه لاسلیک کړي، چې پکې د افغانستان او ازبکستان ترمنځ د ترجیحي سوداګرۍ موافقه، له قرغیزستان سره د اقتصادي او تجارتي همکاریو تفاهملیک او د همکاریو د پراختیا لارنقشه، له پاکستان سره د ترجیحي تعرفو او ترانزیټي موضوعاتو تړون، او د ایران د سیستان او بلوچستان ولایتونو سره د ګډو اقتصادي همکاریو اسناد شامل دي.
مولوي ذبیحالله مجاهد ویلي، چې تېر کال افغانۍ کرنسي باثباته پاتې شوې، د بهرنیو اسعارو پر وړاندې یې ارزښت لوړ شوی، انفلاسیون ټیټ و او د خوراکي او لومړنیو توکو بیې د سیمې د هېوادونو په پرتله کمې وې. د نړیوال بانک د وروستي راپور له مخې، افغانستان په ۲۰۲۵ کال کې ۴.۳ سلنه اقتصادي وده ثبت کړې ده.
نوموړي د بنسټیزو پروژو په برخه کې ویلي، چې د کمال خان بند پاتې کارونه بشپړ او ګټې اخیستنې ته وسپارل شول، همداراز د کابل شاهوعروس بند او د هرات پاشدان بند پاتې چارې هم بشپړې شوې. د هغه په وینا، په غزني کې د زردالو بند، په تخار کې د کوکچه سفلی بند او په بغلان کې د کیلګي بند د مطالعاتو چارې هم تېر کال پیل شوې دي.
تر دې وړاندې، د هېواد د اوبو مدیریت په برخه کې د ۹ سترو بندونو چارې بشپړې یا تر کار لاندې شوې او ۳۴۱ واړه بندونه (چکډېمونه) هم جوړ شوي دي.
د امنیتي او ټولنیزو برخو په اړه، د اسلامي امارت ویاند ویلي، چې تېر کال د دفاع وزارت د امنیتي ځواکونو د روزنې شمېر ۱۸۱ زره او ۸۴ کسانو ته رسېدلی او ۱۰۰ زره او ۳۰۰ پولیس په بېلابېلو امنیتي، جنايي، سرحدي او لوژستیکي برخو کې له مسلکي زدهکړو فارغ شوي دي.
همداراز د شهدا او معلولینو چارو وزارت له لوري څه باندې ۶۰۰ زره یتیمانو، کونډو او معلولینو ته شاوخوا ۱۲ میلیارده او ۵۰۰ میلیونه افغانۍ مرسته شوې، ۲۵ زره او ۲۲۸ په نشهيي توکو روږدي کسان تر درملنې وروسته عادي ژوند ته ستانه شوي او ۱۰ زره او ۶۶۴ سوالګر راټول او له نغدي مرستو برخمن شوي دي.
مولوي ذبیحالله مجاهد ټینګار کړی، چې اسلامي امارت له نړۍ سره د تعامل پلوی دی، له غرب سره دښمني نه لري، خو خپلواکي، اسلامي نظام او ملي ګټې سره کرښه بولي او هڅه کوي د نړیوالو اړیکو، اقتصادي ودې او داخلي ثبات لپاره خپلې هڅې لا پراخې کړي.
