کابل ټکی کام (سهشنبه، ۱۶ مرغومي، ۱۴۰۴ل)
د اسلامي مقاومت حماس د سیاسي دفتر غړی “باسم نعیم” ویلي، چې په غزه کې لا هم په خاموشه توګه عام وژنه روانه ده.
نوموړي څرګنده کړې، چې د تېرو ۸۴ ورځو راهیسې اشغالګر پرلهپسې سرغړونې کوي او د اسرائیلو لومړی وزیر نتنیاهو او حکومت یې غواړي جګړه بیا پیل کړي یا دا سخت بشري ناورین همداسې دوام وکړي.
باسم نعیم زیاتوي، چې هدف یې دا دی چې خلک مجبوره کړي له خپلې خاورې کډه وکړي.
هغه همدارنګه ټینګار وکړ، چې منځګړي هېوادونه، په ځانګړي ډول امریکا چې د تړون ضامن دی، باید پر نتنیاهو او حکومت یې جدي فشار راوړي ترڅو تړون په بشپړه توګه عملي شي، ځکه دا حالت نور زغملو وړ نه دی.
