عطاءالله مبارز
شيخ الحديث مولوي شهاب الدين دلاور صاحب، چې اوس د افغاني سرې مياشتې ټولنې رييس دی، نوموړی د هېواد له هغو اغېزناکو شخصيتونو څخه شمېرل کېږي چې ژوند يې د انسانيت، خدمت او اخلاص په رڼا کې تېر شوی دی. هغه يوازې د مقام له مخې نه، بلکې د خپل عمل، اخلاقو او ژمنتيا له کبله د خلکو په زړونو کې ځانګړی ځای لري. د ده شخصيت دا څرګندوي چې رښتينی مشرتوب هغه دی چې د ولس له دردونو سره ځان شريک کړي او د ستونزو د حل لپاره عملي ګامونه واخلي.
د نوموړي تر رهبرۍ لاندې افغاني سره مياشتې ټولنې خپل بشري خدمتونه د هېواد تر ټولو لرې پرتو سيمو پورې رسولې دي. بې وزلي کورنۍ، يتيمان، کونډې، بې ځايه شوي وګړي، ناروغان او له ګاونډيو هېوادونو څخه په زور را ايستل شوي کډوال د ده د پاملرنې اصلي محور جوړوي. هغه هڅه کړې چې مرستې يوازې د مادي اړخ تر کچې محدودې نه وي، بلکې د خلکو عزت، کرامت او روحي ځواک هم وساتل شي. د ده په باور، اصلي خدمت هغه دی چې د انسان وقار پکې خوندي پاتې شي.
د مرستو دا بهير تر ننه دوام لري او ورځ تر بلې لا پياوړی کېږي. شيخ صاحب تل هڅه کوي چې مرستې منظمې، عادلانه او د واقعي اړتيا پر بنسټ ووېشل شي. هغه د ولس ستونزې له نږدې اوري او کوښښ کوي چې د حل لپاره يې دوامدار او اغېزمن ميکانيزمونه رامنځته کړي. همدې اخلاص او صداقت د خلکو باور پرې زيات کړی او د يوه امانتدار مشر په توګه يې پېژندنه پياوړې کړې ده.
شيخ صاحب يوازې يو اداري مشر نه دی، بلکې يو لوړ علمي شخصيت هم دی. ده د خپل ژوند اوږده کلونه د قرآن کريم او حديث شريف تدريس ته ځانګړي کړي دي. زرګونه شاګردان يې روزلي او د علم په رڼا يې د ډېرو خلکو فکري او اخلاقي روزنه کړې ده. د (شهاب الباري) په نامه یې د بخاري شريف شرحه ليکلې ده، چې دا د ده د ژور علم، پراخې مطالعې او قوي فکري بنسټ څرګندونه کوي.
سياسي ژوند يې هم د اصولو او ثبات څرګندونه کوي. هغه خپل سياسي فعاليت د اسلامي نظام د حاکميت، د عدالت د ټينګښت او د ملت د هوساينې لپاره وقف کړی دی. دی باور لري چې يو سالم نظام هغه دی چې د خلکو حقونه خوندي کړي، د مظلوم ملاتړ وکړي او د هر وګړي لپاره د عزتمن ژوند زمينه برابره کړي. همدې فکر د ده ټول دريځونه او هڅې منظمې او هدفمنې ساتلې دي.
د شيخ صاحب د شخصيت بله مهمه ځانګړنه دا ده چې خبرې يې له عمل سره يو ځای روانې دي. دی هڅه کوي چې يوازې ژمنې و نه کړي، بلکې ژمنې په عمل بدلې کړي. همدې ځانګړنې هغه د ولس په منځ کې د باور وړ ګرځولی او ډېر ځوانان يې د ژوند د يوې ښې بېلګې په توګه يادوي.
په پای کې ويلای شو چې د ده ژوند د علم، عمل او مسئوليت يوه ژوندۍ انځورګري ده. هغه شخصيت دی چې خپل ژوند يې د ځان لپاره نه، بلکې د ولس د خدمت لپاره وقف کړی دی. که زموږ په ټولنه کې د داسې شخصيتونو شمېر زيات شي، نو بې له شکه به هېواد مو د پرمختګ، عدالت، يووالي او سوکالۍ پر لور لا چټک ګامونه واخلي.
