کیم جونګ اون: اوسنۍ نړۍ کې قانون یوازې زور او پرمختللې وسلې دي
کابل ټکی کام (چهارشنبه، ۲۴ مرغومي، ۱۴۰۴ل)
د شمالي کوریا مشر “کیم جونګ اون” ویلي، چې په نننۍ نړۍ کې د قانون او اصولو مفکوره یوازې له زور، ځواک او پرمختللې ټکنالوژۍ سرچینه اخلي، نه له عدالت او ارزښتونو څخه.
نوموړي ټینګار کړی، چې که یو هېواد زورور ځواک ولري، نو د نړۍ ټول قوانین، اصول او تعاملات یې تر کنټرول لاندې وي.
هغه له خپلو امنیتي او دفاعي ځواکونو غوښتي، چې د هر ډول ناورین یا سخت وضعیت لپاره دې هر وخت چمتو وي، ځکه نړۍ د زور له منطق پرته نه چلېږي.
کیم زیاته کړې، چې شمالي کوریا به خپلو دفاعي پروګرامونو ته دوام ورکوي، څو له نړیوال فشار او ګواښ څخه خوندي پاتې شي.
