کابل ټکی کام (یکشنبه، ۱۲ سلواغه، ۱۴۰۴ل)
صهیونيستي ورځپاڼې «هآرتس» په یوه تحلیلي راپور کې اعتراف کړی، چې اسرائیلو د غزې جګړه په سیاسي، پوځي او اقتصادي ډګرونو کې بایللې ده.
د راپور له مخې، اسرائیلو په دې جګړه کې شاوخوا ۷ زره پوځیان له لاسه ورکړي او تر ۲۵ زرو ډېر پوځیان معیوب شوي دي. همداراز د جګړې مالي تاوان نږدې ۱۵۰ میلیارده ډالرو ته رسېږي.
هآرتس لیکلي، زرګونه اسرائیلي شرکتونه زیانمن شوي، صنعتي سکتورونه ټکني شوي او د پانګونې بهیر سخت زیانمن شوی دی.
راپور زیاتوي، اسرائیل د کډوالۍ سیاست هم بایللی او د یهودانو د بېرته ستنېدو بهیر کمزوری شوی دی.
د ورځپاڼې په وینا، د عربي هېوادونو سره د اړېکو عادي کېدو بهیر درېدلی، اسرائیل د لوېدیځې نړۍ پراخه همدردي له لاسه ورکړې او له ګڼو لوېدیځو علمي او اکادمیکو بنسټونو سره یې اړېکې پرې شوې دي.
په راپور کې ویل شوي، د فلسطین د قضیې د له منځه وړلو هڅې ناکامې شوې او اسرائیل په نړیواله کچه خپل شهرت او هغه روایت چې ځان یې قرباني معرفي کاوه، له لاسه ورکړی دی.
هآرتس همداراز څرګندوي، په جګړه کې سلګونه زغروال وسایط او پوځي تجهیزات له منځه وړل شوي او اسرائیلي رژیم د نړۍ د یهودانو په وړاندې هم خپله پخوانۍ هیبت له لاسه ورکړې ده.
