کابل ټکی کام (شنبه، ۲۵، سلواغه، ۱۴۰۴ ل)
د اسلامي امارت ویاند، ذبیحالله مجاهد، پر افغانستان د بندیزونو د څار ډلې د ماموریت د غځېدو په غبرګون کې ویلي، چې د بندیزونو دوام یو ناکام سیاست دی او پر داسې تګلارو باید له سره بیاکتنه وشي، څو د مثبت او رغنده تعامل زمینه برابره شي.
ښاغلي مجاهد ټینګار کړی، چې د بندیزونو غځول او د څار ډلو د ماموریت دوام تکراري او ناکامه تجربه ده او دا ډول اقدامات د ستونزو په حل کې هېڅ اغېز نه لري.
نوموړي زیاته کړې، چې نړیواله ټولنه، په ځانګړې توګه لوېدیځ هېوادونه، باید له هغو اقداماتو ډډه وکړي چې د تېرو ناکامو سیاستونو تکرار وي. د ده په وینا، دا ډول پرېکړې د تعامل او باور جوړونې پر ځای واټن زیاتوي.
مولوي مجاهد همداراز ویلي: «له بده مرغه، ملګري ملتونه په دې برخه کې یا خپله د داسې پرېکړو بشپړ واک نه لري او یا هم هغه کړۍ چې له افغانستان سره مثبت تعامل نه غواړي، هلته ډېر اغېز لري.»
هغه یو ځل بیا له لوېدیځو هېوادونو وغوښتل، چې د افغانستان پر وړاندې په خپلو اوسنیو پالیسیو له سره غور وکړي.
د اسلامي امارت ویاند د چین او روسیې دریځ ستایلی او ویلي یې دي، چې افغانستان اوس مهال د پرمختګ په حال کې دی او همکارۍ ته اړتیا لري، نه د بندیزونو تمدید ته.
دا څرګندونې وروسته له هغه شوې دي چې نړیوالو سازمانونو د افغانستان په اړه د خپلو څارونکو ډلو ماموریتونه د یو بل کال لپاره تمدید کړي دي.
