کابل ټکی کام (پنجشنبه، ۷ کب، ۱۴۰۴ل)
د ایران د بهرنیو چارو وزیر، سید عباس عراقچي، چې د ایران او امریکا ترمنځ د درېیمې اتومي خبرو اترو لپاره جنیف ته تللی، د چهارشنبې په ماښام د عمان د بهرنیو چارو وزیر بدر البوسعيدي سره وکتل.
په دې لیدنه کې د ایران د اتومي پروګرام او د نړیوالو بندیزونو د رفع کولو اړوند د خپل هېواد موقف شریک کړ.
عراقچي د عماني وزیر د هڅو ستاینه وکړه او ویې ویل چې د خبرو بریا د دواړو خواوو جديت ته اړتیا لري او اړینه ده چې متضاد موقفونه او کړنې ونه منل شي. له بل خوا، د عماني وزیر هم د ایران د ډیپلوماټیکې تګلارې ملاتړ وکړ او د خبرو د بریالیتوب لپاره یې د خپل هېواد مرستې ژمنه وکړه.
تر دې مخکې هم څو جلا پړاوونه ناستې شوي، چې پکې دواړو خواوو د اصولي موقفونو تبادله کړې ده، خو تر اوسه هیڅ رسمي تړون ته نه دي رسیدلي.
