کابل ټکی کام (پنجشنبه، ۷ کب، ۱۴۰۴ل)
د حماس اسلامي غورځنګ یو لوړپوړي غړي ویلي، چې پر ایران روان سیاسي او اقتصادي فشارونه په حقیقت کې د فلسطیني قضیې سره د هغه هېواد د ښکاره ملاتړ او ریښتینې همکارۍ سزا ده.
د حماس د سیاسي دفتر غړي “عزت الرشق” ټینګار کړی، هغه هېوادونه او لوري چې د فلسطین د مقاومت ملاتړ کوي، په بېلابېلو پلمو تر فشارونو او بندیزونو لاندې نیول کېږي.
د نوموړي په وینا، دا ډول اقدامات به د فلسطیني ملت او د مقاومت محور پر دریځ هېڅ اغېزه ونه لري.
الرشق زیاته کړې، چې ایران له کلونو راهیسې د فلسطینیانو له مشروع حقونو ملاتړ کړی او د صهیونیستي اشغال پر ضد یې سیاسي او اخلاقي دریځ خپل کړی دی.
د هغه په خبره، د همدې ملاتړ له امله ځینې نړیوال قدرتونه هڅه کوي چې تهران منزوي کړي او د فشارونو له لارې یې دریځ بدل کړي.
نوموړي ټینګار کړی، چې د فلسطین قضیه یوازې د یوه ملت موضوع نه ده، بلکې د ټول اسلامي امت ګډ مسوولیت دی او هر هغه هېواد چې په دې لاره کې درېږي، باید د فشارونو پروا ونه کړي.
حماس همداراز ویلي، چې د سیمې وروستي تحولات ښيي، چې د مقاومت محور لا هم پیاوړی دی او د سیاسي فشارونو او ګواښونو له لارې به د فلسطین د خلکو اراده کمزورې نه شي.
