ټرمپ: دفاعي شرکتونه به پنټاګون لپاره د پرمختللو وسلو تولید څلور چنده زیات کړي
کابل ټکی کام (شنبه، ۱۶ کب، ۱۴۰۴ل)
د امریکا ولسمشر ډونالډ ټرمپ اعلان کړی چې د دفاعي صنعت لویو شرکتونو موافقه کړې چې د پنتاګون لپاره د پرمختللو وسلو تولید څلور چنده زیات کړي.
نوموړي دا څرګندونې وروسته له هغې وکړې چې د جمعې په ورځ یې د څو سترو دفاعي شرکتونو له مشرانو سره لیدنه وکړه.
ټرمپ ویلي چې په دې غونډه کې د «بي اې اې سيستمز»، «بوینګ»، «هانيویل»، «اېل۳ هاريس»، «لوکهیډ مارتین»، «نورثروپ ګرومن» او «رېتیون» شرکتونو اجرایوي رئیسانو برخه اخیستې وه.
د هغه په وینا، د وسلو د تولید د پراخېدو بهیر له غونډې درې میاشتې مخکې پیل شوی او د فابریکو جوړول او د وسلو تولید لا دمخه روان دی.
هغه په خپل ټولنیز پلیټفارم «ټروت سوشیال» کې ویلي چې امریکا د منځني او درنو مهماتو نږدې نامحدود زېرمه لري چې په بېلابېلو عملیاتو کې کارول کېږي، خو د اړتیا له امله یې د دغو وسلو لپاره نوي فرمایشونه هم زیات کړي دي.
ټرمپ زیاته کړې چې له دفاعي شرکتونو سره به بله غونډه دوه میاشتې وروسته ترسره کړي.
