کابل ټکی کام (شنبه، ۲۳ کب، ۱۴۰۴ل)
د حماس اسلامي غورځنګ د پوځي څانګې “القسام” لېوا ویاند “ابوعبیده” د قدس نړیوالې ورځې په مناسبت په خپل پیغام کې ویلي، چې پر صهیونیستي ریژیم د ایران توغندیز بریدونه هغه ګوزارونه دي، چې د فلسطین د کړیدلي او ټپي ولس زړونه یخوي.
ابو عبیده زیاته کړې، چې د ایران د خلکو له لوري د میلیونونو کسانو پراخ لاریونونه او د جګړې له سختو شرایطو سره سره د مشرانو له ولس سره یوځای لیدل کېدل، د فلسطین د ملاتړ په اړه د ایران د اصولي او ثابت دریځ یو بل څرګند ثبوت دی.
ابوعبیده ټینګار کړی، چې د فلسطین د قضیې ملاتړ د ایران د ولس او مشرانو له بنسټیزو دریځونو څخه دی.
د حماس پوځي ویاند د خپل پیغام په پای کې پر ایران د امریکا او صهیونیستي ترهګر ريژیم روان بریدونه کلکو ټکو غندلي او د ایران اسلامي جمهوریت ته یې په روانه خونړۍ جګړه کې د بشپړې بریا دعا کړې ده.
