کابل ټکی کام (یکشنبه، ۹ وری، ۱۴۰۵ل)
د «ریښتینې ژمنې» عملیاتو په دوام، د ایران پوځ اعلان کړی، چې پر اسرائیلو او د سیمې په بېلابېلو عربي هېوادونو کې یې د امریکا پر پوځي اډو پراخ بریدونه پیل کړي دي.
د راپورونو له مخې، بریدونه د اشغالي فلسطین په یافا (تل أبیب)، حیفا او عسقلان کې د صهیونیستي پوځ پر مهمو اهدافو ترسره شوي دي.
همداراز ویل شوي، چې متحده عربي اماراتو،اردن، سعودي عربستان، کوېټ او بحرین کې هم د امریکایي پوځ پر اډو بریدونه روان دي.
امریکایي پوځ په سیمه کې پر خپلو اډو د بریدونو پخلی کړی، او اسرائیلي رسنیو هم راپور ورکړی، چې په تل ابیب کې ګڼ توغندي لګېدلي دي.
تر اوسه د دغو بریدونو د تلفاتو او زیانونو په اړه بشپړ جزئیات نه دي خپاره شوي؛ خو راپورونه وایي، چې ایران نوې وسلې کارولي او ښایي ځاني او مالي زیانونه له ځانه سره ولري.
